Da∙al salni bako Tura District Cricket Association (TDCA) Alotgre cricket kal∙chakramo bilsi 23 ni ning∙o ong∙gipa chadamberangna uamangni changa sapaniko porikka ra∙e niangaha. Ia somoio bilsi dal∙gimin me∙a aro me∙chikrangnaba senior dolo ra∙napaniko dakna TDCA o biming segatkugijagipa kal∙giparangko uamangni changa sapaniko niangjolaha.
Bakko ra∙na re∙bagipa bilsi 23 ni ning∙o ong∙gipa cricket kal∙giparang sak 50 mangna bate kal∙e mesokangaha aro senior-oni sak 14 mang re∙baaha ine koborna parakata.
TDCA ni dongimin porikka ra∙anio uamang name kal∙e mesokgenchimode joljol district na kal∙na seokaniko dakanggen. Uandake district gadango uamangni changa sapaniko jakkale kal∙anio nambatgiparangko a∙dokni dolo ra∙napaniko dakangskagen. Ia porikka ra∙anio seokako man∙gipa cricket kal∙giparangni bimingrangko salsa salgnini ja∙mano u∙iataniko dakanggen ine TDCA parakataha.
