EGH Williamnagar o National Sports Week ko August 24 tarikoni District Sports Office aro District Administration bakrime August 29 tarikona ong∙atangenga. Da∙al salni bako a∙jani dingtang dingtang office rangni gisepo kal∙susaaniko chong∙motan biltinge budu salgrikaniko nikangna man∙aha. Ia kal∙susaanio a∙jani DC Vibhor Agarwal dongpae chegipa office o kam ka∙giparangna boksisrangko suale on∙anikoba dakangaha.

Ia kal∙susaaniko ong∙atani miksonganiara office o kam ka∙giparangni janggi tangani gadangrangko namdapatna aro salantio an∙seng baljoke be∙en bimangko mangrake rakkinagita ong∙atangaha.A∙jao dingtang dingtang kal∙susaanirangko anti gimiko nikangnagita man∙gen unbaksana sakantikon gisiko nange bakko ra∙pachinaba District Sports Office didianganiko on∙angaha.