NEIGRIHMS o MBBS poraienggipa chatro chatrirangna sak 50 ni biapko baridapatna ma∙mong sorkari tik ka∙angaha ine Health & Family Welfare ni Union Minister Dr. Bharati Pravin Pawar August 24 tariko u∙iataniko on∙angaha. Meghalaya a∙doko sanna bannaniko skie ra∙chakram biapko rikchakatna miksonganioba ma∙mongoni dingtang dingtang nangani kri dakchakaniko on∙anggen ine ua agandapangaha.
NEIGRIHMS-o dingtang dingtang kam ka∙anirangko nirokeaniko dake re∙baenggipa bilsioni sak 50 na biapko baridapatgen jean da∙o dongenggipako chane chu∙gimik sak 100 na biap dongskagen. Unbaksana medical college aro nursing college rangko taridapna ma∙mong sorkarioni NEIGRIHMS-na crore 600 ko chamaha ine Dr. Bharati u∙iataniko on∙angaha.
Sanna bannaniko dakanio dingtang dingtang sorkarini scheme rangchi namdapatna Prime Minister ni niksamsoanio pangchake ma∙mong sorkarini gita re∙baenggipa bilsi 9 ba bilsi 10 oni primary, secondary aro tertiary care rangko on∙a rakbee kamrangko ka∙aniko dakenga. NEIGRIHMS-ko namdapatna ma∙mong sorkari dingtang dingtang nanganirangna tangka paisa chamaniko dakengaha. Batanggimin bilsio 480 crore aro ia bilsio 528 crore ko chamaha, iako niatengon bilsio baridape tangka chamaniko nikna gita man∙enga ine Dr. Bharati aganangaha.
NEIGRIHMS-o sanna bannaniko dakanio namdapatna ma∙mong sorkarini kam ka∙anio Radio-therapy ko sokatna man∙aniba mingsa chu∙sokani ong∙a. Unbaksana Meghalaya a∙doko sanna bannani ko skie ra∙chakram biaprangko baridapatanioba ma∙mong sorkarini gita dakchakanggen ine ua aganangaha.
