University Hospital of Ayurveda and Naturopathy (UHAN) jean North East ni skanggipa multi-specialty Ayurvedic hospital ko USTM campus o Health and Family Welfare, Minister Dr.Ampareen Lyngdoh oprake on∙angaha. Ia ayurvedic hospital o da∙o dipetde sak 100 ko donchakna biaprang donga jeon dingtang dingtang sanna bannani gimin am∙sandianirangko aro namgipa kolrangko jakkalaninko dakengaha. USTM damsa poraichakram biap ong∙e dikdiksa somoini gisepon tang∙doaniko niknagita man∙aha aro poraiani a∙bao dingtanganiko ra∙bana man∙gipa ong∙a ine Lyngdoh aganaha.
USTM ni Chancellor Mahbubul Hoque baksa bakrime ia hospital ko kulina man∙e namen katchabeani ong∙a aro a∙dok sorkari mikkangchi USTM campus ni ning∙o PA Sangma International Medical College & Hospital ko rikna miksongenggipana chu∙gimik dakchakanikoba on∙anggen ine Lyngdoh agandapaha.
Mikkangchi 2030 na skangan chu∙gimik sanna bannani gadangrang jekai Allopathy, Unani, Siddha aro Homeopathy rangko ra∙baan baksa uarangni gimin am∙sandianirangkoba USTM campus-on dakanggen ine USTM ni Chancellor aganangaha. UHAN ge∙sa gadang nambatgipa sanna bannanirangko on∙enga aro gitcham Panchakarma dakbewalko jakkale on∙kanggipa, u∙i ma∙sigipa, changgipa sapgipa doctor rang baksa paramedic dolrang dangdike on∙enga ine parakataha
