August jani 31 tariko Garo Hills Chess Association (GHCA) School Level Chess Tournament aro workshop ko ong∙atanggen ine koborna parakataha. Ia tournament ona International Master aro Chess Base India ko bikotchenggipa Sagar Shah skanggipa changna Garo Hills ona re∙bae chess kal∙susaanio dongangpagen ine u∙iatangaha. Ia somoio ua chess tournament-kosan niangaigija workshop koba dilanganiko dakange chess kal∙aniko namnikgiparang baksa agan golporimaniko dakangjolgen ine GHCA u∙iatangaha. Kal∙chakani biapko ru∙utgijaan GHCA dolrang u∙iatanggen ine koborna parakataha.
Ia tournament o bak ra∙nagita sak 50 nasan biaprangko on∙a tik ka∙angenga aro tarake bak ra∙nagita GHCA ni +919089540916 numberna WhatsApp ka∙ate August 30 na skang bimingtangko segate ra∙pachina u∙iatangaha. Ia kal∙susaanio gadang 5 ona sokdoanggiparangna trophy aro certificate ko on∙an baksana boksisrangkoba on∙anggen ine u∙iatanikoba on∙angaha. Ian Garo Hills ni itihas o skanggipa chess kal∙ani a∙bao niksenggipa kal∙gipani re∙baani ong∙enga aro chess kal∙giparangna skie ra∙na namgipa cholba ong∙enga.
