Gipin a∙songo sanna bannanio dangdike on∙a sak 200 nurse-rangko seokanga

Batanggimin salrango kamgri dongenggipa nurse rangna gipin a∙songo kam ka∙na ine Overseas Nursing Job Fair ko ong∙atgipao a∙dokni sak 200 nurse rang seokako man∙angaha. Ia fair ko Health & Family Welfare Department aro Meghalaya State Skill Development adita company rang jekai Navis HR Pvt. Ltd, Nursedge, Trained Nurses Association India aro Ajith Enterprise baksa bakrime ong∙atangaha.

Seokako man∙gipa nusre rang da∙o dingtang dingtang a∙songrango jekai U.K, Japan, Australia, Germany aro gipin a∙songrango kam ka∙angna cholko man∙angskaenga. Ia fair ona sak hajalsana bate bak ra∙genchimoba sak 200 kosan seokangaha. A∙dok sorkarinigita training o bak ra∙na seokako man∙gipa nurse rangna hajal 50 ko on∙a Chief Minister ku∙chakaha jekon uamangni kam ka∙e beton man∙gipaoniko katiskagen ine parakangaha.