Meghalaya State Commission for Women (MSCW) na gital chairpersonko seoknagita sandianiko aro seokaniko dakgipa committee rang antigni ni gisepo bimingrangko man∙sona ka∙dongsoenga ine Social Welfare ni Minister Paul Lyngdoh parakataha.
Lyngdohni aganani gitade ru∙utgija somoirangni gisepon MSCW ni Chairperson na seokaniko dakanggen aro Chairmanko seokanio maming dakeba politics kal∙e seokaniko dakna man∙jawa ine ka∙dongani kattarangko on∙ataha. Sandianiko aro seokaniko dakgipa committee rangna July ni 24 tarikon u∙iataniko dakangaha ineba Lyngdoh u∙iataha.
Seokaniko dakna gita Social Welfare ni Commissioner aro Secretary in-charge chairperson ni biapko ra∙e dilanggen. Secretary in-charge personnel aro AR department, Director of Social Welfare, Deputy Inspector General of police (DIG CID) aro Director of Health Services official member rang ong∙anggen. Unbaksana Lady Keane College Shillong ni Principal, Women’s College Shillong ni Principal, Social work ni Head of Department aro MLCU rang committee ni non-official member rang ong∙e kamko ka∙angskagen.
MSCW ni Chairperson, Vice-Chairperson aro member rangna, ia kamni bidingo name u∙i-ma∙sigipa, me∙chikrangni namgnina dangdike on∙gipa, neng∙nikanirangko chagronge ma∙sigipa manderangkosa seokaniko dakchina committee ko didiataha.
