Batanggimin salo National Health Mission (NHM) ni kamrangna A∙chik jatrangoni darangba kamna kragiparang dongja ine Chief Minister ni agangipa kattarangna Garo Hills ni NGO aro ma∙a-paarang raken jegalaniko dakataha. Ia kamrangko ka∙na namen changgipa sapgiparangko nanga jeon Garo Hills-oni darangba kam sapgipa dongja ine Chief Minister aganangaha.
NHM ni kamrangna Khasi Hills na agre maming u∙iatanikon on∙jaha aro ia kamrangara Garo Hills o rakkinagiparangsa ong∙genchimoba A∙chikrangoni saksaba seokako man∙jaha ine uamang janapangaha. .
Ia kamrangna suale rimnapna Garo Hills o bang∙a chu∙ongagita poraia skia man∙gipa nurse rang donga ine janapate Garo Graduate Union, Senior Citizen Forum aro New Tura Development Forum August 27 tariko Chief Minister na lekka sedoataha. Garo Hills o GNM aro BSc Nursing ko mingsinggipa sanna bannaniko skie on∙gipa a∙damrangoni matchotgiminrang bang∙en donga ine CM ni agananiko ra∙chakna man∙jae parakangaha. NHM ni kamona rimnapako man∙gipa pilakan A∙chikkuko agana man∙gijagiparangsa ong∙ani gimin kamrangko ka∙anio neng∙nikaniko man∙gen ine uamang agandapangaha.
Dingtang mancha skidapaniko ra∙na nanggenchimode jadokna specialize course ko Tura ni TB hospital training hall o ong∙atna man∙a jeon Garo Hills ni sapgipa chadamberangko kamrangna rimnapanio apsan suale on∙a man∙pagen ine agandape on∙angaha. A∙chikrangna kamrangko tikatna man∙gijako sorkari talatja dipet gital kamrangna rim∙napgiminrangko dontongatchengnaba uamang janapangaha.
Apsandaken Meghalaya Pradesh Youth Congress ni General Secretary Junebirth C. Marak ba MLHP o kamna rimnapanio A∙chikrangni bimungrang dongjaniara uamang ia kamna galrikjasa ba kamna chu∙ongagita pora skia dongjani a∙sel sa ine Chief Minister ni aganchakaniara ra∙chakna man∙gijani ong∙a ine suk ong∙gijaniko parakataha.
MLHP kamna rimnapanio NEIGRIHMS aro Woodland institution-o poraigiparangkosa ra∙napaiode gipin Government institution-o poraigiparangde kamna seokna kragipa ong∙jama ine sing∙doanikoba dakangaha. Una agreba A∙chik ku∙sik agana man∙gijagipa manderangko seokanira Garo Hills a∙jani kona noksiko songdonggiparang maikai agangrike sanna bannaniko dakna man∙gen ineba Marak agandapangaha.
