Meghalaya Education Department ni Advisor HM Shangpliang a∙dokni skulrango NEP ko ra∙gatna tarisamsoanirangko dakna a∙bachengenga ine u∙iataniko on∙angaha. NEP ko chu∙gimik ra∙gate kamrangko ka∙angna ja∙ku de∙anirango Education Commission aro Textbook Review Committee koba songangaha ine parakataha.
Textbook Review Committee ni gita da∙o jakkalenggipa skie ra∙ani bakrangko nipiltaianiko dakangan baksana ki∙tapni ning∙o donggipa bakrangkoba name nipiltaianiko dakanggen ine u∙iataha. Chatro chatrirang mongsongbate Meghalaya a∙dokni ithias, a∙a chia aro daka rika bewalrangni gimin skie ra∙na man∙na gita cholrangko on∙angna miksongangenga ineba parakataha.
