A∙doko bijoli den∙ani somoirangko Shillong aro Tura songjinmao dingtangataniko dakanggen ine Power Minister AT Mondal mijal salni bako parakangaha. Uni kobor ra∙timgiparangna agananganigitade bijoli den∙aniko September sa tarikoni pringwalni 1 bajioni 3 bajiona dakatskagenok ine u∙iatangaha. A∙dokni dingtang dingtang bakrango bijoli den∙aniko konta gittamna dakangkugen ineba ua janapangaha.
Bijoli wataonio neng∙nikanirangko a∙doko namdapatna jotton ka∙engon bijoli den∙aniko da∙onaba dontongatna man∙kujaenga. Iani bidingo a∙doko songdongenggipa manderang suk ong∙gijaniko aro chu∙ongnikgijaniko social mediarango parakataniko an∙ching nikna man∙ronga. Mikkarang kraagita wagenchimoba bijoli den∙ani bidingo pangnan manderangni sing∙doanirangko nikenga.
A∙dok sorkari bijoli wataniko namdapatna dongtang dingtang cholrangchi jekai sal aro balwaoniko bijoli bikotna chanchisoanirangkoba battanggimin salrango parakangaha. Sal oniko bijoli bikotnagita a∙dok sorkari Chief Minister’s Solar Mission ko 2023 bilsini August 11 tariko oprake on∙angaha.
