Tura Govt College ni Botany Department, NEHU Tura campus ni BIRAC BioNEST Bioincubator Facility baksa nangrime Entrepreneurship ba biltang jaktangchi an∙tangtangni changa sapaniko jakkale badingchiwale janggi tangani cholko man∙agita Awareness programko salsana Tura Government College ni Auditorium o ong∙atangaha. Ia programo sak 150 mangna batpile 5th semester o poraienggipa chatro chatrirang bakko ra∙e skie ra∙angaha.
An∙tangtangni changa sapaniko jakkale maikai chu∙sokgipa ong∙e bading chiwale cha∙na man∙ani bidingo BIRAC BioNEST Bioincubator Facility ni CEO SK Nandy, Programme Manager Alva Margareth Kharkongor aro Laboratory Assistant Shanbor Sayoo bak ra∙gipa chatro chatrirangna nambee skie on∙angaha. Una agreba ia programo bading chiawalanio ja∙rikna nanggni niamrangkoba noksarango mesoke agantalate on∙angaha. Indakgipa skie on∙anirangko ong∙atanichi chatro chatrirangko an∙tangtangni changa sapaniko jakkale ja∙tango ga∙chate bading chiwalaniko dakna gisiko nangatna didianiko on∙anian ong∙a.
