Garo Hills Chess Association aro Tura-ni District Administration dolgni nangrime One Day School Level Rapid Chess Tournament aro Workshop-ko Tura SMELC building-o da∙al salni bako ong∙atangaha. Ia kal∙susaanio Tura Don Bosco Skulni chatro Arano Rikrim Ch. Momin 24.5 ko man∙e skanggipa ong∙aha aro Tura Aeroville Skulni chatro Ras Lal Upadhaya 24 ko man∙e gnigipani biapko man∙angskaaha.
Unbaksana St. Thomas Resubelpara skulni chatro Nikman G. Momin gittamgipa, Dalu Lilium Montessori skulni chatri Cheaha Nikgame G. Momin brigipa, Duragre skulni chatro Dinnes G. Momin bongagipa aro Casarina Public skulni chatri Amaziah Gapesa Ch. Marak dokgipa gadango man∙e chegipa ong∙angaha. Kal∙susaanio chegipa sakantina trophy, medal aro tangkarangko uamangna cheani boksis gita on∙angaha.
International Master, Sagar Shah mongsonggipa sokgipa ong∙e bak ra∙angan baksa School Education & Literacy-ni Director Swapnil Tembe ba ia kal∙susaanio re∙bae bak ra∙angpaaha. Meghalaya Chess Association-ni President K M Warjri dingtangmancha chatro-chatrirangna didiani kattarangkoba aganangaha.
Ia susaanio Tura jolni adita skulni chatro chatrirang chu∙gimik sak 42 mang sokbae bakko ra∙angaha. Workshop ko ong∙atanio Garo Hills ni chatro-chattrirangna dingtangmancha kal∙susaani gamchatani bidingo International Master Sagar Shah agantalate on∙an baksa ku∙pattie on∙angjolaha.
