August 30 tariko North Garo Hills a∙jani Resubelpara SBI bank o Pradhan Mantri Awaas Yojana Gramin (PMAYG) scheme ni namgniko man∙giparang ua jolni Gram Sevak Cameo Sangma ni dakchakanichi bank account baksa aadhaar ko nangrimatna man∙angaha. Aadhaar ko bank account baksa nangrimatanio manderang neng∙nikanirangko chagrongsimani gimin branch ge∙antionan office oni mandeko watchape dakchakaniko on∙angenga.
Sorkarini Aadhaar Base Payment System ko jakkalna tik ka∙ahani gimin ma∙mong sorkarini dingtang dingtang schemerangni namgniko man∙enggipa sakantian account-ko aadhaar baksa nangrimatnagita nangengaha. Mitam manderang nangrimatgija donani a∙sel batanggimin salrango tangka man∙anio neng∙nikanirangko chagrongna nangaha. Sakanti blockni ning∙ao donggipa sorkarini schemerangko man∙enggipa nokdangrang uamangni tangka paisa man∙anio neng∙nikaniko chagrongjanagita accountrangko aadhaar baksa nangrimate ra∙pachina Resubelpara C&RD blockni gita u∙iataniko on∙angjolaha.
