Pekatgipa bosturangko jakkalani aro badingsrukanirang batrikrikaniko champengna North Garo Hills Pulis Department, Bajengdoba Higher Secondary School o mikrakataniko on∙a gita program ko ong∙ate skie on∙angaha. Ia programona skie ra∙na re∙bagipa chatro chatrirang sak 200 na bate bakko ra∙angaha ine koborna parakataha. Ia somoio a∙jani pulis dolrang bakko ra∙gipa chadambe bi∙sarangna pekatgipa bosturangko jakkale namgijaona sokanganiko aro pekgipa bosturangko jakkalgija an∙seng baljoke dongani cholrangko agantalate on∙angaha.
Batanggimin salrango International Day Against Drug Abuse & Illicit Trafficking ko manina skang pilak a∙jani pulis department rang songantion mikrakatani program rangkoba ong∙ataniko an∙ching nikangaha. Ia program rango songsalni bi∙sarang pekatgipa bosturangko jakkale nosto ong∙aoniko naljokatna aro indakgipa bosturangko niamni a∙palo bading chiwalgiparangko champengsona miksonge ong∙atangaha. Uandake pulis dolrangni nirok sandianichi pekatgipa bosturangko a∙dokni dingtang dingtang bakrango badingsrukgipa manderangko rim∙na man∙anikoba an∙ching nikna man∙enga. Chief Minister ni agananio, niamni a∙palo ka∙enggipa kamrangoniko naljokatna nirok sandianiko pulis dolrang baksa raken sorkarinigita ja∙ku de∙anggen ine aganatalatanikoba nikangaha.
