Payment for Ecosystem Services (PES) Scheme ni ning∙o Ganol chibisiko tange rakkina kam ka∙enggipa songrangna gnigipa changna tangka paisa on∙anirangko dakna da∙al salni bako Tura Dakopgre SMELC o programko ong∙atangaha. Ia program-ona a∙dokni skotong dilgipa Conrad K. Sangma, WGH a∙jani DC Jagdish Chelani, GHADC ni Environment & Forest ni EM Ashahel D. Shira, Centre of Excellence for NRM & Livelihood ni Co-Chairman aro Director S. Ashutosh, officer rang aro dingtang dingtang songni manderang bakko ra∙angaha.
Ia pilot project ni ning∙o chirangko chibimaona nambate jokatna kam ka∙asan ong∙aigija a∙dokni bol wa∙arangkoba ripinge jelatpilna re∙mikkangani ong∙a. A∙dok gimiko da∙o dipet WGH a∙jao dam 20 songrang, EGH a∙jaoni damsa Ganol chibima baksa nangchapegipa songrang ia kamko jako ra∙e chiring chibisikrangko tangchapilatna ja∙ku de∙angenga. Ia kamko ka∙enggipa songni manderangna skanggipa gamaniko uamangni bank account rangona 2022 bilsini October 17 tariko gamangaha aro gnigipa changna song dam 18 na gong lakh 64.82 tangkarangko da∙al salni bako gamaniko dakangskaaha.
