Umiam chi chimongchakram biapko kabatgipa dollongko taridapna miksonganio department ni gita Indian Institute of Technology (IIT) Guwahati-oniko report ko sengkuenga ine Power Minister Abu Taher Mondal parakataha. Umiam dollongko taridapna dingtang dingtang neng∙nikanirangko aro dakna nangkuenggiparangko am∙sandie nina, technical committee, Meghalaya Energy Corporation Limited (MeECL) aro Public Works Department (PWD) ni officer rangna bilko on∙manaha ine parakataha.
Umiam chi chimongchakram dollongni nosto ong∙angenganiko sing∙doani ja·man Power minister, IIT Guwahati ni u∙i-ma∙sigiparang baksa May 16 tariko Umiam dollong-ona re∙ange nirokeaniko dakangaha. Umiam chi kapenggipako mangrakbate aro nambate tarian baksana a∙paloni biaprangko songre songgabatgiparangna nina nitonagita miksonge taridapna Budbar salni bako Umiam dollongko re∙ange nirokeanikoba dakangaha. Dollongko taridapani bidingo chanchirimaniko dakangon, IIT Guwahati oni report sokbagipako technical committee ona ra∙angchenge, adita a∙dokni dilgiparang baksa chanchirimaniko dakani ja∙man kam ka∙chakatna sal aro tarikrangko tik ka∙anggen ine Mondal u∙iatangaha.
