Resubelpara pulis station ni ning∙o ga∙akgipa Damring chibimani sepangjolo donggipa Putimari songo an∙tangko kadingdee sigipani manggisiko darangba ra∙na re∙bakujaenga ine pulis dolrang parakataha. Uni manggisiko August 30 tariko man∙aha jean da∙o namen soaha ine koborna parakataha. Sigipani manggisiko da∙o Mendipathar Health Centre o rakkie donenga maina ua mandeni ma∙drang maharirang ra∙na re∙bakujaenga.
Pulis dolrangni manggisiko man∙ani somoio bimang soahani a∙selo mandeni gimin mamingkon u∙ina man∙jaha ine janapangaha. Uamangni parakatanigitade sigipa mande chola a∙mangrong aro ning∙o gangipa gisim rongko gana ine u∙iataha. Ia mandeni ma∙drang maharirang uko ra∙na re∙bajagenchimode uni manggisi sobeahani gimin pulis dolrang gope galaona sokanggen ine parakataha.
