South Garo Hills Rongsepgreo rikchipgija gale donenggipa Polytechnic College nokko Gasuapara GSU dolrang A∙king nokma baksa re∙ange nianiko dakangaha. Ia bida nokko a∙jani manderangna 2018 bilsion a∙dok sorkarini on∙gimin ong∙a jekon 2019 bilsioni rika cho∙anirangko a∙bachengataha aro da∙o galchipe donengaha ine GSU rang u∙iatangaha.
Gasuapara GSU unit ni dilgipa Sengrik M. Marak ni agananigitade ia bida nokko rika bilsi bri ong∙pilahaoba da∙onaba matchotatkuja ine parakataha. A∙jani namgnina aro poraina sikgipa bi∙sarangna bidako sepangbata biaponiko skie ra∙na man∙agita songni nokma ia a∙ako sorkarina indin on∙aha ineba u∙iataha. Songni ning∙o rikenggipa ia bida nokko man∙a dipet tarake niatpachina aro rika cho∙aniko kamrangko matchote ka∙e on∙pachina GSU dolrang Baghmara ni MLA Kartush Marak ko mol∙molangaha.
