Da∙al salni bako Chief Minister Conrad Sangma, Forest & Environment Department baksa tom∙bimonganiko dake department ni pilak kamrangko nipile chanchirimangaha. Ia tom∙bimonganio Forest (Conservation) Amendment Bill 2023 aro department ni ka∙na nanggipa kamrangni bidingo name chanchirimanganiko dakangaha.
Ia somoio Forest Department ni ning∙o ka∙enggipa dingtang dingtang project rang jekai Meghalaya State Zoo, namdapatna aro ripingna ka∙enggipa projectrang, unbaksana kajina man∙giminko jakkalsretaoni naljokatna chanchirimangaha. Ia tom∙anio departmentni pilak officer rangko uamangni jako ra∙e kam ka∙enggipa projectrangko somoigita matchote ka∙pachina Chief Minister didianiko on∙angaha. Sangma uamangko gipin departmentrang baksa bakrime kamrangko chu∙sokatani gamchatanikoba agane on∙angjolaha.
