South Garo Hills aꞏjani Chokpot jolni dolbri NGO rang jekai FKJGP, AHAM, AYWO aro GSMC bakrime September 2 tariko tom∙e chanchirimaniko dakangaha ine koborna parakataha. Ia tomꞏaniara Garo Hills o ja∙manchakbatgipa Chokpot jolni biaprangko maikai namdapataniko ra∙bana aro bilakbate kamko ka∙na ja∙ku deꞏangna miksonge chanchirimangaha.
Chokpot Civil Sub Division-ni ning∙o dingtang dingtang sorkari department-rang gnang, indiba uarangoni bang∙bata department-rangni kamrango chu∙sokna man∙gijaniko nikenga. Bilsi 50 batpilahaoba ua jolo maming dingtanganiko nikna manꞏkujaenga aro sorkarini kamko kaꞏgiparang dongoba maming dangdike onꞏaniko nikna gita manꞏkujaenga ine parakataha. Iarangni aꞏselan ua jolo songdongenggipa manderang nengꞏnikanirangko changrongrongenga ine u∙iataha. Ia obostarangni a∙selo kamrang maini gimin chu∙sokna man∙gijani ja∙pang ja∙dilko am∙sandianiko A∙chik jatni namgnina ja∙ku de∙anggen ine AYWO Chokpot branch ni President Malseng Ch. Marak parakangaha.
