Chokpot Dareng chibimani sepang jolo donggipa biaprangoniko niamgri ro∙ong bikotenggipani bidingo Chokpot Area Vigilance Committee (CAVC) dolrang GHADC ko niatpachina mol∙molangaha. Adita salrangna skangba uamang Deputy Chief Executive Member (CEM) Nikman Marak aro Forest & Environment-ko jako ra∙enggipa Ashahel D. Shira-ko grongenba ia niamgri ka∙enggipa kamrangni bidingo u∙iatangaha. Uamangni agananigitade jolo songdongenggipa manderangni changni chang champenganiko dakoba kamrangko dontongkujaenga ine parakataha.
Dareng chibimaoniko niamgri ro∙ongrangko bikotanichi sepang jolo dongkamgipa manderangnasan neng∙nikaniko on∙aigija chibimanaba namgijaniko ra∙baengani gimin iani bidingo raka ja∙kuko dena nanga ine CAVC parakataha. Iarang pilakan mandena aro chibimana mikkangchi namgijako ra∙bagen ine uamang Ashahel D. Shira ko grongani somoio janapangjolaha. Ia jolo donggipa a∙arang council o dongimin 6 schedule ni ning∙o ga∙aka aro ia niamgri kamrangko GHADC-ni Executive Member niatnaba ra∙chakangaha. Unbaksana uamang ia ro∙ongrangko bikotna GHADC oni No Objection Certificate (NOC) rang dongja aro uamang ia kamko ka∙na man∙jawa ineba Shira janapangaha.
