Dadenggre Sub-Division ni ning∙o MTET porikkao chu∙soke donggiparang skigipani kam na nakatatjanina suk ong∙gijaniko parakataha. Uamangni aganani gitade gipin biaprang jekai Baghmara, Tura, Ampati, Jaintia Hills, Khasi Hills o MTET pass ka∙giparangna skanggipa changna kamna rimnapaniko dakmanaha aro gnigipa changna rimnapna tarisamsoanikoba dakengaha. Indake ong∙genchimoba Dadenggre division nide da∙onaba skanggipa changna kamna rimnapaniko dakkujaenga ine matnangataha.
Dadenggre Division o skanggipa changna kamna rimnapaniko dakujani gimin gipin biaprangchi kamna galgenchimoba gipin Division ni gita ra∙chakja ine uamang janapataha. Gipin biaprango skanggipa batch-o kamna rimnapaniko 2020 bilsion matchotman∙ahaoba Dadenggre division ni MTET pass ka∙e donggiparang skanggipa aro gnigipa batch dolgnian sengna nangkuenga ine association janapataha. Indake dakaniara Dadenggre jolni MTET porikkao chu∙sokgiparangni kosako onia ka∙ani gita ong∙a ine jako ra∙enggipa department rangko iani bidingo nanga ja∙kurangko de∙china association rang didiataha.
