Meghalaya Assembly ni September 15 tarikoni salbongana autumn session ong∙atnasienggipa namen komia ine Congress ni dilgipa aro Opposition Chief Whip, Saleng Sangma aganangaha. Salbongana ong·atnasigipa session-o manderangni nanganirang aro neng∙nikanirangko golporimna somoirang chu∙ongjawa ine Sangma suk ong∙gijaniko parakangaha.
Sangma ni agananigitade ia sessionko komibeoba sal 15 ba 20 na ong∙atna nanga ine janapangaha. Manderangni nangnikanirangko golporimna Assembly damsa biap ong∙a jeon a∙jatangnikosan ong∙aigija a∙dok gimiknikon mikkango done chanchirimna man∙a. A∙doko golpona nangchongmotgiparang jekai Job Reservation Policy, Assam a∙dok baksa sima ario tom∙tomgijani aro skia poraiani bidingrango che∙eme golpona nanganirang donga ine Sangma aganangaha.
Session o golporimna mikkangchakgipa dolrang sorkariko sing∙dona tarisamsoenga jeon NEP 2020 aro sima arini bidingo jera ra∙ani ong∙naba gnang ine Sangma agandapangaha.
