Chang 62 gipaTeachers’ Day manianiko District Administration Education Department baksa Tura district auditorium o ong∙atangaha. Ia bakrobegipa program ara Dr. Sarvepalli Radhakrishnan ni atchiani salko skigiparangni bi∙sarangna on∙kange dangdike on∙anirangna mittelpilaniko dakani sal ong∙a. Unbaksana ia salo neng∙nikgija an∙tangtangko on∙kange songsalna dangdike on∙gipa skigiparangna mittelpilani gita award rangko on∙anikoba dakangjolaha. Nambatgipa Scout master aro Guide captain rangnaba award rangko on∙angaha.
WGH a∙jani DC Jagdish Chelani baksa ICFAI University ni Adviser Dr. Viola Sonachi B. Sangma aro gipin dal∙dalgipa manderangba dongpae L.P, U.P aro Secondary section rangni nambatgipa skigiparangna District Award ko on∙angaha. District award ko man∙gipa skigiparangara Masumata Govt. L.P skulni Satal A. Sangma, Chitoktak L.P skulni Headmistress Purida I. Sangma, Secondary section ni Subrata Sen, Garo Union Secondary School ni Scout master Ningban R. Marak, Little Flower Secondary Schoolni Guide captain Sarikha A. Sangma ong∙a.
Poraia skiani baksa bi∙sarangni je a∙bao gisik nanganikoba nigrike didianiko on∙a nanga ine DC aganangaha. Skigiparangni ta∙rake bi∙sarangni gisik nanganio ka∙donganiko aro didianiko on∙anian bi∙sarangko matsrambatatna dakchakani ong∙a ineba DC skigiparangko mittelpilan baksa aganagaha. Ia tom∙aniona sokbagiparangoni District School Education Officer Tenang K. Sangma, ICFAI University ni Adviser Dr. Viola Sonachi B. Sangma, aro Sub-Divisional School Education Officer Samuel Ch. Marak mangba ku∙pattianiko on∙angaha.
Ia tom∙anio skigiparang baksa chatro chatrirang na kal∙anirangko Govt. Boys Higher Secondary School ni skigipa Nancy A. Sangma ong∙atangaha aro manderangko an∙sengatna Tura Public School aro KGBV Jengjal School ni dingtang dingtang dakmesokanirangkoba dakangaha.
