Batanggimin salrangonin Meghalaya a∙doko dingtang dingtang sabisirangoniko naljokatna Intensified Mission Indranush (IMI) 5.0 nigita Medical Department rangni tikka su∙anganiko Ku∙rongdik kobor ra∙timgipao gatataniko niksona man∙enga. Apsandaken IMI ni gnigipa changna a∙bachengataina South West Garo Hills a∙jao tikka su∙aniko September 11 tarikoni a∙bachengatgen ine parakataha.
SWGH a∙jani dingtang dingtang songrango IMI ko a∙bachengataina sanna bannaniko on∙enggipa Medical Department ni manderang re∙ange tikka su∙aniko dakna sal aro somoirangko man∙chie donmanaha ine parakataha. Ia kamko re∙mikkangna skang SWGH a∙jani Deputy Commissioner ni gita dingtang mancha Line Department, songko nokko dilenggiparang, toromo re∙dilenggiparang, Ma∙apaarang aro Self Help Group (SHG) rangko chu∙gimik bakrimaniko on∙pachina mol∙molangaha.
