Sorkarini dakchakako man∙e gipin a∙doko MBBS ko poraienggipa doctor-rang poraia matchotani ja∙mano a∙doktango dangdike on∙jagenchimode gong Lakh 30 aro specialist doctor-rang crore 1 tangkarangko dai gamna nanggen ine da∙al salni bako Health Minister Ampareen Lyngdoh parakataha. Ia dai gamna nangani niamara gital taria ong∙ja indiba skangonin dongimin niam donga ine ua aganangaha.
MBBS ko poraia matchote a∙dokna dangdike on∙jani a∙sel Meghalaya Medical Council (MMC) ko Health Department a∙bachengataha jedakode a∙doko doctorrang komibeoba neng∙nikanirangko chagrongna nangjawa ineba Lyngdoh aganaha.
Ia somoio MBBS course ko matchotgipa doctorrang a∙doktangoni ong∙kate gipin a∙dokrangona license rangko tarinagita re∙angenga. A∙doko medical council dongahani gimin Meghalayani pilak doctor rangan ia council o bimingrangko segatna nanggen ine Lyngdoh u∙iataha. Sorkarini dakchakako man∙e a∙palchi poraina watatengon bimingrangko see rakkianiko dakgen aro poraia matchote skanggipao medical council ona re∙bapile biming segatchenge doctor ni kamna ranta ka∙ani license ko ra∙na gita man∙gen jedakode iako dakanichi a∙dokna dakchakbeani ong∙gen ine Lyngdoh agandapaha.
