Bilsi antian September 5 tariko Teachers’ Day ba skigiparangni salko uamangni songsalna on∙gilaniko gisik ra∙e manirongbaenga. Meghalaya a∙doknigita chang 62 gipa skigiparangni salko Shillong songjinmani U Soso Tham Auditorium o skigiparangko mande ra∙aniko dake mijal salni bako maniangaha.
Ia program o a∙dokni Education Minister Rakkam A. Sangma mongsonggipa sokgipa ong∙e bakko ra∙angaha aro poraia skiani gamchatani aro skigiparangni chatro chatrirangna on∙kange dangdike on∙anina mittelpilskaaniko aganangaha. Skigiparangan chadamberangni skie ra∙anirango, u∙ianio ma∙sibatna man∙agita aro songsalo namgnina kamrangko ka∙na dakchakgipa ong∙a ine Sangma talataniko on∙angaha.
Ia program o Meghalaya sorkari a∙dokni dingtang dingtang skulni skigiparangna, uamangni chadamberangni miksonganirangko skie on∙e dakchake chu∙sokatanina mande ra∙ani chingita State Award rangko on∙angjolaha. Uamangoni Garo Hills ni skigiparang Rongreng Baiza Govt. L.P skulni Head Teacher Babansing Ch. Sangma, Daram Govt. U.P skulni Headmaster Wilton Marak, Dobasipara U.P skulni Frederick R. Sangma aro Chengkompara Nokat Govt. L.P skulni Head Teacher Mirabella G. Sangma State Award ko man∙angaha.
