South West Garo Hills a∙jani Deputy Commissioner, R P. Marak, Meghalaya High Court ni ge∙etgimingita be∙en bitinrangko bangbango done paljachina a∙jani bajar committeerang baksa Ampati Circuit House-o tom∙e chanchirimangaha. Ia tom∙bimonganio SWGH a∙jani, ADC (Judicial) Y. W. Momin, BDO-cum-Executive Magistrate, District Veterinary Officer A. M. Momin, AH & Veterinary Departmentni officialrang aro Pulisrang dongpae bakko ra∙angaha.
Ia tom∙bimonganio a∙jani DC be∙en bitin pale cha∙enggiparangna bangbango aro rama sambajolrango be∙enrangko palanichi biaprangko rongtalatgijaona ra∙baasan ong∙aigija cha∙naba rongtalgijani ong∙a ine agantalatanirangko dakangaha. Una agreba HC ni ge∙etgimin niamrangko manijagenchimode mikkangchi neng∙nikanirangko chagrongnaba donga ine DC agandape on∙angaha. A∙jani bajar committeerang be∙en bitinrangko bangbang done palaniko nirokchina aganangan baksa a∙dimu aro mitchigipa bosturangoni be∙enko naljokate rongtalgipa donchakanirango done palaniko nirok sandie kam ka∙chinaba DC mol∙molangaha. Iani bidingo jagnina skangan pilak bajar committee rangna u∙iataniko dakmanaha aro Animal Husbandry & Veterinary officialrangko be∙en bitinrangko palgipa biaprangona re∙ange nirok sandianiko dakchina ge∙etmanaha ine ADC Y. W. Momin agandapangaha.
