Purakhasia jolni Niksamso Garo Community Organisation (NGCO) dolrang songko nokko namdapatna sorkarini chamatgimin tangka paisarangko jakkalsretanina Makalgonchu Youth Club (MYC) dolni Secretary Charlindro Ch. Marak ni kosako Purakhasia pulis thana o badi ka∙angaha. Songko nokko namdapatna chamatgimin tangkarangoniko maming kamko ka·gija matchotaha ine tol·e sakkiko on·aniara songdongenggipa manderangko cha·bokani ong·a ine NGCO dol janapangaha.
Purakhasia NGCO dolni President Chasrang M. Marak ni aganani gitade club ni Secretary, Santogre songna paikana rikna tangka gong 1.5 lakh, Murigre songna waiting shed rikna gong lakh sa, Balamagre, Darechikgre aro Gimbilgre songna culvert tarina gong lakh prak chamatgipa tangkarangko kam ka∙gija oke ra∙aha ine ma∙sinagita man∙aha. MYC dolni Secretary ni kosako niam gita raka ja∙kurangko de∙e bichal ka·angchina gita NGCO dolrang pulis department ko didiangaha.
