Meghalaya a∙doko chubata gadango poraianirangko nambatatatna nangchongmotanina kamrangko ka∙nagita, Garo Hills-o donggipa gimik college rangni Principal rangko Don Bosco College, Tura o tom∙bimongate chanchirimaniko dakangaha. Ia tom∙e chanchirimanio Shillong ni Directorate of Higher Technical Education (DHTE) ba bak ong∙pae chanchirimanio bakko ra∙angaha. PM-USHA project ko ma∙mong sorkari mikkangchi poraia skiani gadangko nambatatna aro tang∙doatna a∙bachengate on∙angaha.
Ia tom∙aniko IAS aro Education department ni Principal Secretary Ambrose Ch. Marak aro DHTE dilangaha. A∙dok gimikni poraia skiani gadangko nambatatna cholrangko am∙sandie sorkarini nikjumangsoanirangko ia tom∙anio chanchirimangaha.
State Project Directorate, RUSA, DHTE office ni Principal Consultant Rangksan Mawroh sokbagipa Principal rangna ia kamko ka∙na ka∙dongatanirangko on∙angaha. Unbaksana rika cho∙anirangko aro poraiani gadangko namdapatna ma∙mong sorkarini chamgimin tangka paisarangko man∙agita jotton ka∙e kamrangko ka∙chinaba college ni Principal rangko Mawroh didiangaha.
Meghalaya ni a∙dok sorkari a∙dok gimikni poraia skiani gadangko namdapatna aro tang∙doatna miksonge kamrangko ka∙nasienggiparangni gimin Mawroh agan talate on∙angaha. Sorkarini kamko ka∙na manchisoe dongipa rika cho∙anirangkosan mangmang namdapataigija poraienggipa chatro chatri rangna poraia skiani gadangko namdapatna am∙sandianirangko daknaba cholrangko on∙anggen ine Mawroh agandapangaha.
A∙dokni college rang sorkari baksa bakrime miksonganirangko dondime mikkangchi kamrangko ku∙cholsan ka∙anggenchimode poraia skiani gadango a∙gimiko susagipa damsa a∙dok ong∙na man∙gen ine Ambrose Ch. Marak tom∙bagipa Principal rangna aganangaha.
Bon∙kame ia tom∙anio Principal rang poraia skiani gadangko nambatatna an∙tangtangni ka∙na nanggipa kamrangko on∙kange ka∙na aro mikkangchini namgnirangna PM-USHA project ni ning∙o mamong sorkarini dakchakanirangkoba man∙agita jotton ka∙angen ine ku∙rachake parakangtokaha.
