Rajabala H.S School aro Bhaitbari H.S School o kakket ong∙gija kamna nakatatgipani bidingo All Meghalaya Minority Students’ Union (AMMSU), Central Executive Committee ni dilanichi Directorate of School Education & Literacy (DSEL), Shillong o ia kragija kamna matnanganiko dakangaha. Ia kamrangna nakataniko school ge∙gninian notice board rango August 23 tariko tape donangaha ine u∙ina man∙aha.
2020 bilsini July 1 tariko Education Department ni parakatanigitade class 1 oni class 8 ona skulrango skigipani kamrangna rimnapna MTET ko nangchongmota ine janapataha. WGH a∙jani DSEO ni ning∙o ga∙akgipa ua jolni school rang kamna nakatatanirango niamko ja∙rikjaenga aro badia gadangna kamko ong∙katatenga maming janapani dongja ine uamang parakangaha. Rajabala H.S School ni kamna tape dongipao Assamese o major dakgipako am∙angaha jekon National Council for Teacher Education (NCTE) ni gita ge∙ataniode Secondary gadango skigipani kamko ka∙na B.Ed an chu∙onga ine janapa donga.
Iani bidingo matnanganiko dakanggipa dolrang ia ge∙gni skulrango kamna nakatataniko den∙galchina aro Education Department ni ge∙etagita 2020 July 1 tarikoni ia skulrango skigipani kamrangna rimnapaniko nipiltaichina mol∙molangaha.
