Rongram C&RD Block ni ning∙o ong∙gipa Waribokgre Nokrakki Cluster Level Federation (CLF)-o Saksham Centre ko September 8 tariko oprake on∙anio NABARD DDM, DFS-FI, Rongram SBI Branch ni official aro Rongram Blockni APO bakko ra∙angaha. Ia programko dingtangmancha Waribokgre songni Cluster Coordinator Mary Balsime Ch. Sangma ni gisiko nange aro rakbee kam ka∙anichi chu∙sokatnagita man∙aha ine parakataha.
Ia Saksham Centre ko oprake on∙aniko dingtangmancha CLF ni skanggipa bilsi ga∙dapaniko gisik ra∙ani salo dakangaha. Unbaksana ia centre ko kulianichi wilwilao dongenggipa Self Help Group (SHG) rangna tangka paisanigitaba dakchakaniko on∙anggen. Sakgni Financial Literacy Cadre-rangko Saksham Centre ni ning∙o dangdike on∙aniko dakna ia programni somoio seokanikoba dakangjolaha.
