Ampati Multi Facility Centre-o District Mental Health Program ko “Creating Hope Through Action” kattao pangchake World Suicide Prevention Day ni salko da·al salni bako gisik ra∙aniko dakangaha. Ia program-o South West Garo Hills ni SP Vikas Kumar mongsonggipa sokgipa ong∙e gisiknigita neng∙nikaniko chagrongenggiparang, nokdangni manderangna u∙iatna nagani aro sakanti manderangni janggini gamchatani gimin agan kupattie on∙angaha.
Ia program-o SWGH ni Medical Superintendent Dr. Denisha Momin, Child Development Officer Torali Marak, District Nodal Officer Dr. Matgrik K. Sangma, skigiparang aro chatro chatrirang dongpae bakko ra∙angaha. Gisikni gita an·seng baljoke dongna nangchongmotgipa aro dakchake on∙ani cholrangko skul-o poraienggipa chatro chatrirang dakmesokanikoba dakangaha.
An·tangtangko so·ote janggi galaniko naljokatnagita gisik ra·ani antio bike rally, skul ni chatro chatrirangna katta bichong sesusaani aro cricket kal∙susaanirangko ong·atangaha. Katta bichong sesusaanio sakgittam chegiparang aro Tura ni A·kawe Motorcycle Club ko ia program-o mande ra·anikoba dakangaha.
Gisiko neng∙nikaniko man∙enggipa manderangni an·tangtangko so·ote janggi galaoniko champengsona South West Garo Hills-ni District Mental Health program ni gita kamrangko ka∙angenga. Unbaksana songsalni manderangna gisiknigita an·seng baljoke dongani gamchataniko aro ka·dongatanina nama ku∙pattianirangko on∙e dakchakna cholrangkoba dakangenga ine ia program-o aganangaha.
