Meghalaya a∙dokni pulis dolrang changsatai bike cha∙ugipako rim∙na man∙anichi chu∙sokaniko ra∙baaha. Babagre songoni ML 08 F 0369 Platina bike bolsako cha∙uaha ine koborrangko man∙soe adita nirok sandianirangko dake Gambegre songoniko rim∙na man∙aha ine pulis dolrang parakataha. Ia bike number ni gita am∙sandianiko dake nion Tonjeng Sangma ni bimingo segatgimin bike ong∙a ine u∙ina man∙aha.
Bike baksa rim∙a man∙gipa mande Raja Apal Kamagittim songoni Srangbirth N. Sangma minggipa Trawin Sangma ni depante ong∙a ine pulis dolrang parakataha. Rim∙a man∙gipa mandeko aro man∙pilgipa bikeko Gambegre IC na man∙a bakan pakwatangaha. Ia mandeni kosako nambate am∙sandianiko dakangkugen aro raka ja∙kuko deanggen ineba pulis dolrang janapangjolaha.
