East Khasi Hills a∙jao me∙chikma saksa doctorni sam see on∙atgipa amoxicillin samni ning∙aoniko gojalko man∙aha ine u∙iatangaha. Ua uni bilsi chi∙gni ong∙gipa demechikni wagam sa∙aniko sanna Pomlum PHC ona ra∙angaha jeon doctor an∙tangan samko jakkalchina see on∙ataha. Sanenggiparangni ge∙ataniko man∙e ma∙gipa an∙tangni bi∙sana samko kanna nion sam ronggnioniko gojal dongako nikaha ine u∙iataha. Uni ja∙mano ma∙gipa PHC official rangko iani bidingo aganchakchina matnanga gnang sing∙doaniko dakangaha.
Ia obosta ong∙a bakan Health Minister Ampareen Lyngdoh, sanna bannaniko dakenggiparang senior specialist ni dilaniko man·e aro Inspector of drugs ko iani bidingo am∙sandianiko dakchina ge∙etataha. Uamangni am∙sandianiko dake nion gojal ge∙sade samna bate namen dal∙bata ine u∙iataha aro matnangatgipani kosako jajaaniko ra∙baaha ine parakangaha. Unbaksana gipin samrangoniko name sandianiko dake nion ge∙saoba gojalko nikjaha ine Dr. Ampareen Lyngdoh aganangaha.
