Chief Minister Conrad Sangma, scientific mining ba niamgita dakna nanggni bewalo koela bikotaniko a∙doko ra∙gatna man∙gijaniara a∙arangko a∙kangna dingtange ja∙rikani a∙sel ong∙enga ine aganangaha. Gipin biaprango sorkarisa a∙arangko a∙kange koelarangko cho∙e bikote biltango bading chiwalgiparangna tik ka∙e on∙a. Meghalaya a∙dokode biltango bading chiwalgiparangsa a∙arangko a∙kangskae, sorkarisa kamko ka∙timgipa ong∙skana nanga aro a∙arangko a∙kangani bewalko nigrikesa sorkari dingtang ramako re∙na nangenga ine Sangma parakangaha. Gipin a∙dokni ja∙rikenggipa niamko Meghalaya a∙doko ja∙rikna man∙jawa aro ian ja·guaniko on∙enga ine Sangma agandapangaha.
Standard Operating Procedure (SOPs) rangko nipiltaie, koela cho·e bikotaniko 100 hectare ona komiatna NGO rangni dabiani bidingo sing∙on, Sangma uamangni mol∙molaniko niatenga ine parakangaha. Ia kattarangko janapgenchimoba ma∙mong sorkari 100 hectare na komiako nangnikja ine ge∙etgimin niamrang gnang ine Sangma aganchakanikoba dakangaha. Unbaksana chu∙gimik ge∙bri kam ka∙nagipa agency rang ma∙mong sorkarioniko NOC man∙aha jekon uamangni cho∙ani kamrangko tik ong∙e ra∙chakujani gimin dontongate donenga ine Sangma u∙iataha.
Kamrangko ka∙na re∙mikkangani da∙o chu∙batgipa gadangona sokahani gimin, pilak dakna nanggni kamrangko antisani gisepon matchotna nangao ga∙akenga ine Sangma janapangaha. Cho∙aniko a∙bachengatna man·agita da∙o dorgasto galgimingitan re∙mikkanggen ineba Sangma agandapangaha. Koela cho∙na re∙chakatani kamrangko sorkari da∙o ra∙chakna tik ka∙angenga aro ia bon∙kama ja∙ku de∙ani ong∙jaoba, ong∙gipa ramakon re∙baengaha ine Sangma parakangaha.
