Da∙al salni bako Mawsynram ni MLA gitcham HM Shangpliang ko NPP ni nokdangona rimchaksoaniko Shillong ni NPP Headquarter office o dakangaha. NPP sorkarini a∙dokna namgipa kamrangko a∙bachengatna man∙anina aro a∙dokko nambata gadangona ra∙dona man∙anian uni party baksa bakrimani ja∙pang ong∙a ine Shangpliang parakangaha. Mikkangchi NPP na kakket ong∙e dangdike on∙a aro dingtang dingtang kamrangko ka∙e party ko dal∙roroatnagita ja∙ku de∙anggen ineba Shangpliang agandapangaha.
Chief Minister Conrad K. Sangma dingtang mancha Shangpliang ko rimchaksoani kattarangko agane uko party baksa bakrimanina mittelpilskaaniko on∙angaha. Unbaksana ia tom∙bimonganio agana cholko ra∙e Party aro NPYF unit rangko bilakatrorona aro mikkangchi nambate kam ka∙nagitaba didianiko on∙angjolan baksa re∙baenggipa bilsi bongao sorkari nambata ja∙kurangko de∙e manderangna kam ka∙ani miksonganirangkoba aganjolangaha.
Ia rimnapani program-o Chief Minister Conrad K. Sangma, Deputy CM Prestone Tynsong aro Sniawbhalang Dhar, NPP ni Adviser Dr. DD Lapang, Rajya Sabha ni MP Dr. W.R. Kharlukhi, Deputy Speaker Timothy D. Shira, Health Minister Ampareen Lyngdoh, Education Minister Rakkam A. Sangma aro party ni gipin dilgiparangba dongpae bakko ra∙angtokaha
