Tamil Nadu a∙dokona songreangmiting somoio gimagipa Turani chadambe saksa Krisan R. Marak ko man∙pilenba uni nokdang baksa chang∙satai apsan ong∙epiltaina man∙aha ine koborna parakataha. U∙iatanigitade ua August jani bon∙angachipak ripengskarangming kam sandinagita Guwahati-oni Tamil Nadu a∙dokni Chennai songjimaona rel gario re∙chakatangaha.
Andhra Pradesh, Vijayawada station ko batangengon uni ripengskarang uko nikjae gimaenga ine u∙itokaha. Ua station ge∙sao maikoba brenagita ong∙one rel garini re∙chakatani somoiko ma∙sirikjahakon ine chanchichipe aganangaha. Unbaksana Marak A∙chikkuna agre Hindi aro English ku∙sikko agana man∙jae neng∙nikanirangko bate chagrongna nangana ga∙akaha. Marakni nokni ma∙drangrang August jani 28 tariko uni gimaaniko Tura police station ona re∙ange janapani ja∙mano Andhra Pradesh police na Turani policerang iani bidingo koborrangko on∙ataha.
Adita salrangni ja∙mano September 4 tariko Andhra Pradesh-ni Visakhapatnam-oniko uko nikenba, sepangbatgipa police station ona simsake dona rimangaha. Koborko man∙a bakan uni ma∙drangrang biapona re∙ange uko noktangona naljoke rimbapilna man∙aha.
Batanggimin salrangoba ia apsandakgipa obostarang ong∙angaha aro iani bidingo pulis dolrang Northeast a∙jaoni gipin a∙dokrangona re∙angengon sakkina chu∙ongagita an∙tangni lekkarangko ra∙angpachina mol∙molataha.
