Delhi songjinmani Hemant Kumar Pradhan ko, East Garo Hills a∙jani sak 300 mang manderangna kam on∙gen ine tangka gong lakh 38 mangko cha∙boke ra∙ahanina pulis dolrang rim∙aha. Pradhan adita NGO, toromni dilgiparang aro songni gitchambatgipa songdonggiparang baksa ku∙mongchenganiko dake batanggimin bilsio poraia skiani gamchataniko Garo Hills a∙jao skie on∙aniko dakna “Shikshya Barta New Delhi” programko a∙bachengate on∙angaha, jean bilsi chi∙bongana kam ka∙anggen ine aganaha.
Programko ra∙baanio District Socio Economic Development Organisation (DSEDO) baksa NGO rang bakrime kam ka∙angna miksonganiko dakangaha ine dolsa NGO ni Secretary James Thuimai parakataha.
Kamna rimnapanio Field worker na sak 275 aro administrative staff na sak 28 ko rimnape tangka gong 5000-13000 japrako dormaha on·gen ine aganangaha. Unbaksana bilsio tangka on∙dapani aro tangka gong lakh 2 insurance koba on∙gen ine u∙iatangaha.
Training program-o dongna gita tangka gong 15,540 ko gamchengna gita u∙iatani gisepon bang∙a manderangan application rang baksa tangkarangkoba ra∙bana gita a∙bachengaha. Una agreba My Home, My School programna tangka gong 90,000-ko Pradhan ni company account-onaba watataha. Manderangko ka·dongatna Pradhan sak 50 BPL nokdangrangna indin kam on∙a gitaba ku∙chakangaha.
Shikshya Barta programni Fieldwork na sak 275 mande nanggipana sak 2000 mangna bate register ka∙tokaha. Mande rimnapani kamrang matchotani ja·mano Shikshya Barta-ko Zonal Education Media Office (ZEMO) ine biming done a∙jani sakgni Minister rangni jakchi oprake on∙aniko dakangaha. Pradhan ko okamataniko dakgenchimoba ia oprake on∙ani program ona re∙bagija office ko chalaiangchina NGO rangko mol∙mole aganataha. Zonal Education Media Office-ko a∙bachengate kam ka∙ani ja∙man jabrina kingking hajira man∙jani gimin July 7 tariko saksa kam ka∙gipa Williamnagar police station-o badi ka∙angaha. Police rang am∙sandianiko joljol dakange, IPC section 403, 406, 420, 467, 468 aro 471 -o pangchake register ka∙angaha.
Pradhanko ja gni mangna kate dongani ja∙mano Amor Colony PS New Delhi-o September 8 tariko pulis dolrangni jakchi rim∙e uko Williamnagar ona ra∙baaha. Dosi dakgipako sing∙sandianirangko dakangkuenga ine SP incharge Shailendra Bamaniya u·iatangaha.
