National Education Policy (NEP) ko ra∙gataniko pilak college rangna namggni ong∙a ine ra∙chakangaha aro ian a∙dokna namgipa jaku de·ani rama ong·enga. NEP ko rang∙gitik ra∙gatna miksonganisa neng·nikaniko on∙enga ine Chief Minister Conrad Sangma parakangaha. NEP ko ra∙gatna dingtang dingtang skie ra·ani subject rangko nanggen aro college rango gital department rangko a∙bachengna tangka paisanigita dakchakanikoba bang·en nanganggen. Science ni a∙bako a∙bachengna, collegeni skigiparangna dormaharangko on∙a, rika cho∙anirangko dakna nanganirangna tangka paisarangnigita sawa dakchakanirangko on∙angskagen ine Sangma uni agananio sing∙anirangko done janapangaha.
Unbaksa bilsi gittam poraina nangaoniko bilsi briona ra·doataniko talatna nanganiara minggipin neng·nikani ong·a ine Sangma janapangaha. NEP ko ra·gatna am∙aniko darangan namnikgijagipa dongja jeon skigiparang, Principal rang aro chatro chatrirang NEP ko nangnike ra∙chakmanaha. NEP ko ra∙gatanio dingtang dingtang policy na nanganirang aro maidakgipa bewalo iako ra·gatna man∙anian mingsa neng∙nikani ong∙enga ine Sangma parakangaha. University aro collegerang sorkari baksa chanchirimani ja∙manosa iani bidingo nambate ma∙sinagita man·gen ine Sangma ka·donganiko on·angaha.
NEHU ni Vice Chancellor, NEP ko ra·gatna am∙anio dontongani dongjawa ine agangipa kattako janapaton, a∙songan iani bidingo re∙mikkanganiko dakani gimin apsan daken Meghalaya a·dokba NEP ko ra∙gate re∙mikkangnagita nangenga ine Sangma aganangaha.
