Meghalaya a∙doko walni somoio bijoli den∙aniko konta 2-3 mangna manderang chagrongangna nangkuaigen ine mijal salni bako Chief Minister Conrad Sangma parakangaha. Bijoli bikote man∙giparangko palnagita sorkari dingtang cholko ra∙gataha jean a∙dokna kajina man∙anio dakchakaniko on∙enga ine Sangma u∙iatangaha.
Ia bijolirangko palanichi MeECL o skanggipa changna kajina man∙anio tang∙doaniko nikna man∙enga. Bijolirangko pale man∙enggipa kajinarangchi MeECL na tangka paisanigita neng∙nikaniko namen dakchakenga aro sorkarina tangka paisanigita nanganirangoba bakrimpae dakchakaniko on∙angenga ine Sangma agandapangaha.
