Da∙ororo niamgri bolrangko badingsrukanirangko champengnagita kamrangko ka·anio chu·sokna man·anina Williamnagar ni AHAM Eastern Zone katchabee parakataniko dakataha. Uamang dolni nirikkigiparangni sandianchi Rongjeng, Songsak Rongrengre Forest Reserve rangoniko bol badingsrukgipa manderangko rim·na man·aha. Unbaksana bolko badingsrukanio jak donggipa mande jean Williamnagar Nengsila songoni Drill Ch. Sangmako rim·nagita man·aha ine parakataha.
Am·sandianirangko dakanio AHAM dolrang badingsrukanio bak donggipa Alto ML-07B 9770 aro Bolero Pickup AS-18C 4160 gari bolgni ko East Garo Hills a·jani ning·tugipa buring rangoniko bol badingsrukna salenggiparangko rim·aha ine u·iataha.
AHAM dolrang bol wa·arang baksa ong·telaigipa gam jin rangko ripingna aro niamgri buring bolgrimrangko nosto ka·giparangni kosako bakan sinjetaniko on·a on·kange kamko ka·enga ine parakataha. Uamangni kam ka·anirango pangchake rim·anio man·gimin bolrangko jako ra·enggipa department rangna pakwatangaha ineba uamang u·iataha.
Buring bolgrimrangko nisiataniko aro niamgri badingsrukanirangko am·sandie rim·anirangko dakaniara mande sakantina namgipa dakmesokani ong·a aro je mandeba indakgipa niamgri kam ka·anirangko nikgenchimode u·iataniko on·pachinaba AHAM dolrang didiangaha.
