Garo Hills ni dingtang dingtang a∙jarangni Pulis dolrang songrikkit aro bajar antirango ong∙enggipa obostarangni bidingo aro pekatgipa bosturangko jakkalanio mikrakataniko on·a programrangko chotchanggija ong∙atangenga. Apsandaken da∙al salni bako South Garo Hills Gasuapara bajar-o aro United Kharkutta Sec Skul-o, kragija manderangko rim∙sruke bading chiwalani, Cigarettes and Other Tobacco Products Act (COTPA), Narcotic Drugs and Psychotropic Substances Act (NDPSA), Cyber Crime, Motor Vehicle Act aro bank ni bimingo tangkarangko cha∙bokgiparangni bidingo manderangna agantalate on∙angaha.
Bajar antiona re∙bagipa bang∙a manderang pulis dolrangni agantalate on∙aniko knae ra∙anganiko nikangaha. Apsan daken United Kharkutta skulni chatro chatrirangnaba naljokani kattarangko agantalate on∙angaha. Ia somoio pulisrang, manderangko rim∙sruke badingchiwale gipin a∙dokrangona watatna dakmikgiparangoni mikrake dongchina, cigarette ba ta∙makurangko palanio aro jakkalanio dakna man∙gijagipa niamrangko u∙ie ra∙china skie on∙aniko dakangaha. Unbaksana gari gora salanio ja∙rikna nanggipa niam retirang aro pekatgipa bosturangko bading chiwalaniko champengna aro naljoke dongchina agantalate on∙angaha.
Ia program rangko ong∙ate pulis dolrang songantini manderangna dingtang dingtang niamrangni gimin u∙iataniko on∙a aro namgijagipa kamrangko champengsonagita ong∙atangenga ine batanggimin salrango uamangni agananirango u∙ina man∙aha.
