Northeast a·dokrangni gisepo skanggipa changna Northeast Fruit Wine Incubation Center ko IHM Shillong ni campus o da·al salni bako skotong Minister Conrad Sangma oprake on·angaha. Ia incubation centre ko a·bachengatanichi churangko tarie an∙tangtangni bilo badinge cha·enggiparang namgipa kolrangko jakkale chuko tarianio, botolrango chipanio aro pale sime cha∙nagita dakchakaniko on·anggen. Ia centerko a·bachengataniara draka biteoniko churangko tarianisan ong·aigija a·doko man·gipa dingtang dingtang bolam biterangonikoba tariangna dakchakani ong·gen. Ian Meghalaya ko India a·song gimiko biteoniko chu tarigiparangoni skotong songjinma ong·atna ja·ku de·ani ong·a ine Conrad Sangma aganangaha.
Batanggimin bilsirango tarianiko niatgenchimode chu tariani aro botol o chipanirang namen nambatroroaniko nikna man·aha. Ia nambegipa ja·ku de∙anichi game cha·gipa aro chuko tarigiparangni man·gnirangko bariatna aro bilakbatatna dakchakan baksa chadamberangko iarangchi ka·e cha·na nama skaniko on·ani ong·a ine Sangma aganangaha. Meghalaya Farmers Welfare Association aro IHM, Shillong ni bakrime ia namgipa ja·ku de·aniko a·bachengataniara janggi tangna chuko bading chiwalaniko dake cha·giparangna, chu tarigiparangna aro Northeast gimikna namgipa chol ong·a ine Sangma agandapangaha.
