Tura Dakopgre-o donggipa Post Office somoigita kulijaengani a∙sel manderang nanggipa lekkarang aro bosturangko ra∙sona namen neng∙nikaniko man∙enga ine Post Office ko jakkalenggipa Dakopgre jolni manderang koborna parakataha. Manderangni parakatani gitade, Dakopgre Post Office-o kam ka∙giparang pringni 11:30 bajiona mangba office ko kulie on∙ja ine u∙iataha. Bang∙bata Dakopgre jolni manderang an∙tangtangni nanggipa lekkarang aro bosturangko sandina re∙angon office chipe donakosa nikeronga. Salantio nanggipa office ni kuliani somoi tik ong∙gijanina jolo songdongenggipa manderang uamangni suk ong∙gijaniko janape pringni 10 bajioni attam 4 bajiona kulie on∙a nanga ine dabianiko dakangaha.
Mikkangchi ia Post Office-ko somoigita kulie on∙jagenchimode, jolni manderang dingtang dakgipa ja∙kurangko de∙angna draatako man·aba donga ine parakataha. Somoigita office ko kulie on∙a man∙jaode office dongani namgni dongja aro chel∙begipa biaprangoni watatgipa bosturangko nangan somoio okna man∙jaode gimaani ong∙a ineba janapataha. Indakgipa obostarang ong∙ani gimin batanggipa bilsirango NGO-rang jegalaniko dakangaha jekon da∙alona kingkingba Dakopgre Post Office-o maming dingtangdapani dongkujaenga. Ia ong∙enggipa obostarangni bidingo bil man∙gipa officeko jako ra∙enggiparangko nirokatpachina Dakopgre jolni manderang mol∙molataha.
