Block ni namroro silroroanina Chintan Shivir nigita officer rangni kam ka∙anirangko ma∙sie ra∙na aro namgipa bewalo kamrangko ja∙rikna National Institution for Transforming India (NITI) Aayog Aspirational Block Programko Resubelpara C&RD Block ni ning·o Mendipathar Multipurpose Hall o ong·atangaha.
Ia program-o NGH a·jani ADC, Nippon Hajong mongsonggipa kattarangko talate on·angan baksa segate rakkianirangosan namdapani aro tang∙doaniko mesokaigija, japangoni a∙bachenge dingtanganiko ra∙bana nangani bidingo officerrangna gisik ra∙ata gnang agane on·angaha.
Programona dingtang dingtang line departmentni officerrang aro uamangna kamo dakchakgiparang ia tom∙e chanchirimanio bak ra∙aniko nikangaha. Ia tom∙anio uamang blockni namdapanina aro dingtanganiko ra∙bana cholrangko gisik a·ning bite chanchirimaniko dakangaha. Blockni kam ka∙na dongimin miksonganirangko aro mikkangchi re∙mikkangna tarigimin ramarangkoba officerrangni agantalate on∙anganiko nikangna man∙aha.
