Meghalaya Cricket Association bilsi 19 ni ning·o ong·gipa me·chikrangni Inter District Cricket Tournament-ko Nongpoh-ni Umbuda Ground-o mijal salni bako ong·atangaha. Skanggipa Semi final-ko South Garo Hills District Cricket Association aro Ri-bhoi DCA-ni gisepo kal·susaangaha. Ia kal·susaanio Ankita Sharma Wicket 5 ko ga·akate Ri-Bhoi DCA ko wicket 3 chi chenagita dakchakaha. Ri-Bhoi dol Zone 1 Group A ni nambatgipa dol ong·aha aro SGH dol Zone 2 o nambatgipa ong·genchimoba kal·susaanio sirikskaaha.
SGH bisil godoanio chegipa ong·e dokchengna tik ka·e over 18.4 o chu·gimik wicketrangko ga·akate 77 run rangko tariaha. Ri-Bhoi DCA dolni Ankita uni skanggipa over ko robol goanio wicket ge·sako ga·akataha. Uni ja·mano ua wicket ge·gnirangko koba ga·akataiaha. Apsan daken Bimala Thakur wicket ge·sako aro Angelica Maring wicket ge·gittamko ga·akatskaaha.
Kal·susaanirango Marme wicket ge·sako ra·aha aro apsan daken Rikmanchi M Sangma, Jaylynn aro Dianchidora N Sangma wicket ge·gniprakko ga·akataha. Kal·susaa changbrini gisepo Rikmanchi da·o dipet chu·gimik wicket chikking ko ga·akate robolko gogiparangoni saksa nambatgipa ong·enga.
Ri-Bhoi DCA da·al salo gnigipa semi final jean Zone 1 Group B ni nambatgipa dol Shillong Cricket Association aro Zone 2 ni gnigipa biapo ong·enggipa Tura District Cricket Association ni gisepo kal·susaanio chegipa baksa final ko kal∙susaangskagen.
