Tura songjinmao July 24 tariko winter capital aro reservation roster-ko nipiltana dabianiko dakanio Chief minister aro adita NGO ni dilgiparang baksa chanchirimani somoio so∙sojengjeng ong∙anio Unlawful Activities Prevention Act (UAPA)-o pangchake manderangko rim·anina TMC ni dilgipa Dr. Mukul Sangma jegalataniko dakataha.
Re·anggipa somoio Unlawful Activities Prevention Act aro Meghalaya Maintenance of Public Order Act -o pangchake sak 52 manderangko so∙sojengjeng ong∙atanio jak donggiparang ine rim∙ako man∙gipa manderangara bobil dakgipa dol-rangonima ine Sangma sing∙doanirangko dakangaha.
Rim∙ako man∙gipa manderangoni bilsi 19-20 ni chadamberangba bak dongpaaha, UAPA-o pangchake uamangko rim∙aniara mikkangchi uamangni janggi tangani cholrangko am∙aniona neng∙nikanirangko ra∙baani ong∙gen ine Sangma aganangaha. Sorkarini gita uamangko dal∙a dosi dakgipa gita mesokaniara kragijani ong∙enga aro iani bidingo Assembly session-o sing·doanirangkoba dakanggen ine ua agandapangaha.
