South Garo Hills a·jani Chokpot Budugre songni A∙king Nokmani ning·o ro∙ong bikote palanirangko ta·raken dontongatchina FKJGP , AHAM, GSMC aro AYWO dolrang, Chokpot Sub-Divisional officer ko gronge memorandumko on·angaha.
A·brirangoniko dal·dalgipa ro·ongrangko bikote bolrangko den·anirangchi buring bolgrimrang bon·angengaha aro chiring chibisikrang tiproroangengani a·sel mikkangchi songdongenggipa manderangna neng·nikaniko on·gen ine dingtang dingtang NGO dolni dilgiparang aganangaha.
Ro∙ongrangko bikotanichi buring bolgrimrangko nosto ka∙e Dareng chi jean Chokpot jolo songdongenggipa manderangna ringani chi, gama ge·anio jakkalna aro dingtang dingtang kamrangna jakkalenggipa chiko nosto ka∙enga ine Chokpot jolni AHAM ni President Charming T. Sangma aganangaha.
Ro·ong bikotaniko dontongatna ia bilsi ni March jaonin dingtang dingtang dolrang aro chatro chatrirang jegale re∙jomanirangko dakangaha. Una agreba ro·ongko bikotenggipa nokgipako ro·ong bikote palna songni nokmako draatani a·selsa iandakgipa obostarangko chagrongna nangengaha ineba songni manderang matnangataha.
