GHADC-o kam ka∙enggipa Non-Gazetted Employees Association (NGEA) aro pilak ka∙rimskarang ja 31 ni dormaharangko man∙kujae neng∙nikanirang batroroenga ine parakataha. NGEA-ni dilgiparang re∙anggipa August 29 tariko GHADC-ni CEM aro gipin EC-rangko gronge, uamangni man∙a nangenggipa dormaharangko September 15 tarikna skang on∙china janapaniko dakangaha. GHADC-ni dilgiparang uamangni somoi on∙agita September 15 tarik batpiloba maming aganchakaniko on∙kujaenga ine NGEA ni President Brithen M. Sangma parakataha. Iani bidingo NGEA, September 18 tariko jinma tom∙e chanchirimaniko dake jingjengatanirangko dakna miksonganiko parakataha.
GHADC o kam ka∙enggiparang ja 31 na kingking dormaharangko man∙jani a∙sel, uamangni nokdangko chalaianio aro songsalni dingtang dingtang kamrango tangka paisa dongpajae bakrimpana chol ong∙jaenga ine u∙iatangaha. Mongsongbate dedrangrangni skulna gamna nanganirangko chu∙sokatanian uamangni dal∙batgipa neng∙nikani ong∙enga aro dedrangna namgipa janggi tangani cholrangko tarisona chol ong∙jaenga ine NGEA-ni President parakataha.
Ia bilsio uamang jagnini dormaharangkosan man∙kuenga aro chu∙gimik jaskuni man∙a nanggnirang dongkuenga ine Sangma parakangaha. Uamangni man∙a nanggni dormaharangko man∙genchimode, nokdangna aro dedrangrangni nanganirangna dangdike on∙a chol ong∙gen ine ua parakangaha. NGEA President ni agananigitade September 15 na skang GHADC ni dilgiparang uamangko okama dongaha aro dormahani giminde maming janapaniko agangija batesa chakchikkuchina didiangaha. Uamang indita bilsina chakchikangaha aro neng∙nikanirangko da∙onaba chagrongengkua ine agane janggi tanganio maming chol ong∙gijaniko parakangaha.
Indakgipa neng∙nikaniko chagrongengani a∙sel changsatai NGEA pilak ka∙rimskarang baksa September 18 tarik Sombar salo apsan tom∙e chanchirimaniko dake jinmani chanchiao pangchake ku∙cholsan nanggipa ja∙kurangko de∙anggen ine parakataha. Jingjenganiko dakengmiting somoio darangkoba office ona kam ka∙na re∙bajachina aro GHADC o kam nange re∙bana miksonggipa manderangkoba re∙bajachina NGEA ni President jinmani palo mol∙molataha. Unbaksana jinma chanchirime ra∙chakgimin ja∙ku de∙na miksonganirangko tom·a matchota bakan parakatgen ine u∙iatangaha.